खूनाचा गुन्हा उघड : आरोपीस अटक ; एलसीबीची धडकेबाज कारवाई.
अहमदनगर- पाथर्डी पोलीस ठाण्यात दाखल असणारे, ११ वर्षापूर्वीचा खूनाचा गुन्हा उघड झाला आहे. वाहनचालकाचा खून करुन प्रेत सिंधखेड राजा, (जि. बुलढाणा) येथे जाळून पुरावा नष्ट करुन नावात बदल व ओळख लपवून राहणारे आरोपीस पकडण्यात स्थानिक गुन्हे शाखेला यश आले आहे. भरत मारुती सानप असे पकडण्यात आलेल्या आरोपीचे नावे आहे, अशी माहिती शुक्रवारी (दि.११) पञकार परिषदेत जिल्हा पोलिस अधीक्षक मनोज पाटील यांनी दिली.यावेळी अपर पोलिस अधीक्षक सौरभकुमार अग्रवाल, स्थानिक गुन्हे शाखेचे पो नि अनिल कटके व स्थानिक गुन्हे शाखेतील तपासी अधिकारी, पोलिस कर्मचारी उपस्थित होते.नाशिक परिक्षेत्राचे पोलीस उपमहानिरीक्षक डॉ. बी. जी. शेखर पाटील यांनी जिल्हयातील गंभीर स्वरुपाचे ना उघड खून, दरोडा, जबरी चोरी उघडकीस आणणेबाबत आदेश दिले होते. त्यानुसार जिल्हा पोलीस अधीक्षक मनोज पाटील यांनी स्थानिक गुन्हे शाखेचे पो नि अनिल कटके यांच्याकडून अहमदनगर यांना जिल्ह्यातील गंभीर स्वरुपाचे ना उघड गुन्ह्यांचा आढावा घेऊन जास्तीत जास्त गुन्हे उघडकीस आणणे बाबत सूचना दिल्या होत्या. त्यानुसार शेवगाव उपविभागीय पोलिस अधिकारी सुदर्शन मुंडे व पोनि श्री कटके यांनी दिलेल्या सूचनेनुसार स्थानिक गुन्हे शाखेचे सपोनि गणेश इंगळे, सफौ राजेंद्र वाघ, संजय खंडागळे, पोहेकॉ बापुसाहेब फोलाने, पोना भिमराज खसे, सुरेश माळी, रविकिरण सोनटक्के, शंकर चौधरी, देवेंद्र शेलार व चापोहेकॉ बबन बेरड आदिंच्या पथकाने ही कारवाई केली आहे.याबाबत समजलेले माहिती अशी की, स्थानिक गुन्हे शाखेचे पो नि अनिल कटके यांनी जिल्ह्यातील पोलीस ठाण्यात गंभीर स्वरुपाचे ना उघड गुन्ह्यांचा आढावा घेत असतांना पोनि श्री.कटके यांना गुप्तबातमीदार मार्फत माहिती मिळाली की, पाथर्डी पोलीस ठाण्यात गु.र.नं. १०७/२०११ भा.द.वि.कलम ३६४, ३९४, ३४ प्रमाणे घातपाताचे दृष्टीने अपहरण व जबरी चोरी करण्याचे उद्देशाने गुन्हा दाखल असून गुन्ह्यातील मुख्य आरोपी भरत मारुती सानप हा अद्यापपर्यंत फरार असून, त्याची कोणतीही माहिती नाही. या दाखल गुन्ह्याची माहिती अशी की, दि. २३ मार्च ११ रोजी नितीन सखाराम सोनवणे (वय २४, धंदा ड्रायव्हर, रा. यमुनानगर, सर्व्हे नं. १९९, विमाननगर, पुणे नगर रोड, पुणे-१४) यांनी पाथर्डी पोलीस ठाण्यात फिर्याद दिली की, दि.११ मार्च १९ रोजी भाऊ अनिल सखाराम सोनवणे (वय २९) हा व त्याचा वाहनचालक भरत मारुती सानप (रा. खडकवाडी, ता. पाटोदा, जि. बीड) असे त्याचे जवळील माल ट्रक (नं. एमएच-१२-एव्ही-६४४९) अशी घेऊन रायपुर येथे बायडींग वायर भरण्यासाठी गेले होते. दि. १६ मार्च ११ रोजी रायपुर येथून ५ लाख ४८ हजार ९४० रु.ची बायडींग वायर भरुन पुणे येथे येण्याकरीता निघाले होते. दि.१८ मार्च २०११ रोजी सकाळी ते जालना येथे आल्याबाबत भाऊ अनिल सोनवणे याने फोन करुन सांगितले होते. त्यानंतर त्याचा फोन लागला नाही. दि. २१ मार्च ११ रोजी मालट्रक बेवारस अवस्थेमध्ये भगवानगड (ता. पाथर्डी) येथे मिळून आली होती. ट्रकमधील बायडींग वायर नव्हती तसेच ट्रकचे कॅबीनमध्ये रक्ताचे डाग दिसले होते. तसेच भाऊ अनिल सोनवणे याच्या सोबतचा चालक भरत सानप याचा फोन बंद होता. यावरुन भरत सानप याने भाऊ अनिल सोनवणे यास जबर मारहाण व घातपात करण्यासाठी अपहरण करुन ट्रक मधील ५ लाख ४८ हजार ९४० रु.कि.ची. बायडींग वायर बळजबरीने चोरुन नेली आहे. याबाबत पाथर्डी पोलीस ठाण्यात गुन्हा दाखल करण्यात आला होता.याबाबत खात्रीशीर माहिती मिळाल्याने पोनि श्री. अनिल कटके यांनी स्थानिक गुन्हे शाखेतील स्वंतत्र पथक स्थापन करुन मिळालेल्या माहितीचे आधारे सूचना करून गुन्ह्यातील फरार आरोपीबाबत माहिती घेऊन अटक करण्याबाबत आदेश दिले. पथकाने गुन्हा व गुन्ह्यातील आरोपीबाबत माहिती घेतली असता आरोपी भरत मारुती सानप (रा. खडकवाडी, ता. पाटोदा, जि. बीड) हा सध्या कन्हेरवाडी (ता. परळी, जि. बीड) येथे स्वतःचे नावात बदल करुन व ओळख लपवून राहत आहे. अशी माहिती तपास पथकास मिळाल्याने त्यांनी आरोपीचा याचा शोध घेऊन त्यास कन्हेरवाडी (ता. परळी, जि. बीड) येथून ताब्यात घेतले. यास त्याचे नाव विचारले असता त्याने त्याचे नाव अभिमान मारुती सानप (वय ३७, रा. खडकवाडी, ता. पाटोदा, जि. बीड) असे चुकीचे नाव सांगून उडवाउडवीची उत्तरे दिली. मी अभिमान मारुती सानप असून तसे आधारकार्ड पथका समक्ष सादर केले. परंतु तपास पथकाची पूर्णखात्री होती की, हाच भरत मारुती सानप आहे. त्यामुळे पथकाने त्यास विश्वासात घेऊन त्याचेकडे कसून चौकशी करता त्यांचेकडे असलेल्या ओळखी बाबतच्या कागदपत्रांची सखोल पडताळणी केली. त्यामध्ये त्याचेकडे सन २००६ मधील मतदान ओळखपत्र सापडले. त्यावर त्याचे नाव भरत मारुती सानप असे असल्याचे निष्पन्न झाल्याने त्याने मीच भरत मारुती सानप असे असल्याचे सांगून पाथर्डी पोलीस ठाण्यात दाखल गु.र.नं. १०७/२०११ भा.द.वि.कलम ३६४, ३९४, ३४ गुन्हा केल्याने मला पोलीसांनी पकडू नये म्हणून मी माझी ओळख लपवून नावात बदल करुन अभिमान या नावाने राहत होतो. अशी कबुली देऊन अनिल सोनवणे हा नेहमी मला माझ्या पत्नी विषयी वाईट बोलायचा त्याचा मला राग होता म्हणून देवरीगाव (जि गोंदिया) येथे ट्रकचे टायरमधील हवा चेक करण्यासाठी आम्ही थांबलो होतो. त्यावेळी आमच्यामध्ये वाद झाले. मला त्याचा राग आल्याने मी त्याचे डोक्यात टायरमधील हवा चेक करण्यासाठी टायर वाजवण्यासाठी माझ्या हातात असलेला व्हील पान्हा त्याच्या डोक्यात मारला होता. त्यावेळी तो जागेवर बेशुध्द झाल्याने मी त्यास तसाच उचलून गाडीचे केबिनमध्ये टाकला होता. मी ट्रक चालवित सिंधखेडराजा (जि. बुलढाणा) येथे आल्यावर अनिल सोनवणे याची हालचाल बंद झाल्याने तो मयत झाला आहे, असे समजून मी त्यास सिंधखेडराजा ते जालना जाणारे रोडवरील खदानजवळ नाल्यावरील पुला जवळ ट्रक थांबवून ट्रकमधील अंथरुन व पांघरुन घेण्याचे कपडे व नाल्याजवळील सुकलेले गवत त्याचे अंगावर टाकून त्यास पेटवून देवून तेथून निघून आलो. त्यांनतर माझ्या ओळखीचे सुनिल आश्रुबा सानप, परमेश्वर उत्तम दराडे यांचे मदतीने ताब्यातील ५ लाख ४८ हजार ९४० रु.कि.ची बायडींग वायरची विल्हेवाट लावली होती.अशी माहिती आरोपी अभिमान ऊर्फ भरत मारुती सानप सांगितल्याने ही बाबतची खात्री करण्यासाठी पोलीस पथक सिंदखेडराजा पोलीस ठाणे (जि. बुलढाणा) येथे जाऊन पोलीस ठाण्यातील अभिलेखाची खात्री केली असता दि. १९ मार्च २०११ रोजी सिंधखेडराजा पोलीस ठाण्यात गु.र.नं. २२/११ भादविक ३०२, २०१ प्रमाणे खून करुन पुरावा नष्ट केल्याचा गुन्हा दाखल असल्याचे दिसून आले आहे. खुनाच्या गुन्ह्यातील आरोपी मिळून न आल्याने गुन्ह्याची अ-वर्ग समरी करुन गुन्हा कायम तपासावर ठेवण्यात आलेला होता.गुन्ह्यांची खात्री होऊन आरोपी निष्पन्न झाल्याने तपास पथकाने आरोपीस अभिमान ऊर्फ भरत मारुती सानप यास ताब्यात घेऊन पाथर्डी पोलीस ठाण्यात हजर केले आहे. पुढील तपास पाथर्डी पोलीस स्टेशन करीत आहे.अशा प्रकारे पाथर्डी पोलीस ठाण्यात दाखल अपहरणाचे गुन्ह्यात आरोपीस अटक करुन ११ वर्षापूर्वी घडलेल्या व सध्या गुन्ह्याची वर्षापुर्वी घडलेल्या व सध्या गुन्ह्याची अ-वर्ग समरी करुन गुन्हा कायम तपासावर ठेवण्यात आलेल्या खुनाचा गुन्हा उघडकिस आणून आरोपीस जेरबंद करण्यात स्थानिक गुन्हे शाखेला यश आले आहे.
