bindas news

खंडाळा (गौरव डेंगळे):अयोध्या धाम येथून श्रीराम मंदिराच्या अक्षदा अनगोळमध्ये कलशातून आल्या आहेत. खंडाळा येथील मारुती मंदिर येथे पूजा,अर्चा व प्रभू रामचंद्राच्या आरती करून रथ मिरवणुकीला प्रारंभ झाला.श्रीराम अनिश डेंगळे,लक्ष्मण शौर्य नगरकर, सितामाता श्रावणी नगरकर तर हनुमान साईराज नगरकर यांनी भूमिका साकारल्या. त्यानंतर सवाद्य अनगोळ मुख्य रस्ता, छत्रपती शिवाजी महाराज चौक, गणपती रोड, म्हसोबा मंदिर, भगवती माता मंदीर, ढोकचौळे गल्ली, मारुती मंदिर येथे या मिरवणुकीची सांगता झाली. मारुती मंदिरामध्ये अक्षदा कलश ठेवण्यात आला. मारुती मंदिरमधून उपकलश तयार करून अक्षता गावातली प्रत्येक घरी पाठविण्यात येणार आहेत. प्रत्येकाच्या घरी अक्षता पोहोचवून अयोध्या येथील श्रीराम मंदिराच्या उद्घाटनाच्या कार्यक्रमाला आमंत्रण दिले जाणार आहे. २२ जानेवारी रोजी हा कार्यक्रम होणार आहे. ज्यांना शक्य आहे त्यांनी त्या तारखेला दाखल व्हावे. प्रत्येक गावोगावी २२ जानेवारीला दिवाळी साजरी करावी. आज खंडाळा गावात प्रभू रामचंद्रमय वातावरण तयार झालेलं सर्वांना बघायला मिळाले. या भव्य दिव्य अशा अक्षदा कलश यात्रेसाठी हजारोचे संख्येने माता-बहिणी व पुरुष वर्ग उपस्थित होता.

कोपरगाव प्रतिनिधी): आज दि.  30/12/2023 रोजी Dysp संदीप मिटके यांना  गुप्त बातमी धारामार्फत माहिती मिळाली की कोपरगाव येथील साई कॉर्नर जवळ नगरपालिकेच्या गाळ्यामध्ये साईगंगा मोटर गॅरेज मध्ये मनोज गिरमे हा इसम चार चाकी वाहनांमध्ये अवैध गॅस सिलेंडर रिफिलिंग करत आहे  . अशी खात्रीशीर माहिती मिळाल्याने कोपरगाव येथील तहसीलदार यांना कळवून संयुक्त कारवाई करण्याकरिता माहिती दिली असता त्यांनी तहसील कार्यालय  येथील पुरवठा निरीक्षक महादेव कुंभारे यांना संयुक्त कारवाई करण्याकरता पाठवले त्यावर सदर ठिकाणी पथकातील पोलीस अमलदार पाठवुन  पंचासमक्ष छापा टाकुन दोन चार चाकी वाहनांसह गॅस सिलेंडर भरण्याचे रिफिलिंग मशीन व 19 घरगुती गॅस टाक्या तसेच 2 कमर्शियल गॅस टाक्या जप्त करण्यात आले आहेत तसेच 1) मनोज चंद्रकांत गिरमे वय 43 रा. खडकी रोड तालुका कोपरगाव 2) अल्ताफ बाबू शेख - वय 48 रा. मनमाड ता. नांदगाव जि. नाशिक या आरोपिंना ताब्यात घेण्यात आले. आरोपींच्या ताब्यातून चार चाकी वाहने , गॅस टाक्या, मशीन असा एकूण 4,66,140 रुपये किमतीचा मुद्देमाल जप्त करण्यात आला आहे.आरोपी विरुद्ध कोपरगाव शहर पोलीस स्टेशन  येथे अत्यावश्यक वस्तू अधिनियम 1955 कलम 3,7 आणि भारतीय दंड संहिता 1860 कलम 285 अंतर्गत पोलीस हेडकॉन्स्टेबल इरफान शेख यांचे फिर्यादीवरून गुन्हा दाखल करण्याचे काम सुरू आहे. या कारवाईमुळे कोपरगाव तालुका परिसरातील अवैध धंदे करणार्‍यांचे धाबे दणाणले आहे.  

*सदरची कारवाई राकेश ओला पोलीस अधीक्षक, अहमदनगर स्वाती भोर अप्पर पोलीस अधीक्षक श्रीरामपूर यांच्या मार्गदर्शनाखाली Dysp संदीप मिटके , PI प्रदीप देशमुख, psi भरत दाते पुरवठा निरीक्षक महादेव कुंभारे, इरफान शेख, अशोक शिंदे, श्याम जाधव, गणेश काकडे , तावरे, ज्ञानेश्वर गांगुर्डे  यांनी केली आहे.*

पाथर्डी (गौरव डेंगळे): पाथर्डी येथे एन व्ही नेट क्लबच्या वतीने ४० वर्षा पुढील खेळाडूंसाठी भव्य लेदर बॉल स्पर्धेचे आयोजन करण्यात आले आहे.आज साखळीतील उपांत्य फेरीच्या  सामन्यांमध्ये वयाच्या पन्नाशीत बॉबी बकालने फक्त ६१ चेंडूत १०२ धावांची झंजावती खेळी करत अशोक जिमखाना संघाला एक हाती विजय मिळवून दिला.आज बॉबीने जुन्या आठवणी ताजा करत सलामीला येऊन १०२ धावांची वादळी खेळी केली,या खेळीत बॉबीने १३ चौकार व ४ षटकार खेचला. बॉबीला सुरेश भोसलेने ३९ धावांची खेळी करत बहुमूल्य साथ दिली. या दोघांच्या सुरेख खेळीच्या जोरावर अशोक जिमखाना संघाने निर्धारित २० षटकांमध्ये ३ गडी बाद २१३ धावा फटकावल्या. २१४ धावांचे आवहान घेऊन मैदानात उतरलेला पाथर्डी लेजंड संघाने १५ व्या षटकात सर्व गडी बाद ९४  धावा करू शकला व सामना अशोक जिमखाना संघाने ११९ धावांनी जिंकून अंतिम फेरीत प्रवेश केला.पाथर्डी लेजंड संघाकडून पापू यामे यांनी सर्वाधिक ३२ धावांची योगदान दिले. १०२ धावांची खेळी करणारा बॉबी सामनाविर म्हणून गौरवण्यात आला.

पाथर्डी (गौरव डेंगळे): पाथर्डी येथे एन व्ही नेट क्लबच्या वतीने ४० वर्षा पुढील खेळाडूंसाठी भव्य लेदर बॉल स्पर्धेचे आयोजन करण्यात आले आहे.आज साखळीतील तिसऱ्या सामन्यांमध्ये वयाच्या पन्नाशीत बॉबी बकालने ८८ धावांची वादळी खेळी करत अशोक जिमखाना संघाला एक हाती विजय मिळवून दिला.आज बॉबीने जुन्या आठवणी ताजा करत सलामीला येऊन नाबाद ८८ धावांची वादळी खेळी केली,या खेळीत बॉबीने १६ चौकार व १ षटकार खेचला. बॉबीला राहुल पटारेने ५९ धावांची खेळी करत बहुमूल्य साथ दिली. या दोघांच्या सुरेख खेळीच्या जोरावर अशोक जिमखाना संघाने निर्धारित १८ षटकांमध्ये ४ गडी बाद २०० धावा फटकावल्या. २०१ धावांचे आवहान घेऊन मैदानात उतरलेला एमसीसी संघाने निर्धारित १८ षटकारांमध्ये ८ गडी बाद १५० धावा करू शकला व सामना अशोक जिमखाना संघाने ५० धावांनी जिंकून उपांत्य फेरीत प्रवेश केला.एमसीसी संघाकडून साईराज साबळे यांनी सर्वाधिक ३६ धावांची योगदान दिले. जिमखाना संघाकडून महेश कांबळेने ४ गडी बाद केले.८८ धावांची नाबाद खेळी करणारा बॉबी सामनाविर म्हणून गौरवण्यात आला.

भुवनेश्वर (गौरव डेंगळे):भुवनेश्वर ओडिसा येथे संपन्न झालेल्या ६७ व्या शालेय राष्ट्रीय व्हॉलीबॉल स्पर्धेत महाराष्ट्राच्या सीबीएसई संघाने प्रथम क्रमांक मिळविला.१४ वर्षाखालील शालेय राष्ट्रीय व्हॉलीबॉल स्पर्धा दिनांक २१ ते २६ डिसेंबर रोजी आयोजित करण्यात आली होती.सदर स्पर्धेत २८ राज्यांनी सहभागी झाले होते. महाराष्ट्राच्या

सीबीएसई संघामध्ये मिलेनियम नॅशनल स्कूल पुणे शाळेतील ९ खेळांडू खेळत होते.सीबीएसई महाराष्ट्र संघाने राजस्थान,दिल्ली,मध्यप्रदेश या राज्यांचा साखळी सामन्यांमध्ये पराभव केला.उपांत्य फेरीचा लढतीत बलाढ्य तमिळनाडू संघाचा रंगतदार झालेल्या सामन्यात ३-२ (२५-२०,२५-२१,१८-२५,२०-२५ व १५-११) ने पराभव करुन अंतिम फेरीत प्रवेश केला.अंतिम सामन्यात उत्तरप्रदेश संघाचा ३:० (२५-२२,२५-२१ व २५-२२) ने पराभव करून विजेतेपद मिळवले.विजयी संघातून संजना गोठस्कर(कर्णधार),उपज्ञा कारले,आरमान भावे,देवकी रावत,ओवी कदमबांडे, सई जगताप, उमा साईगावकर,अन्वी गोसावी, सई घीवे,सखी दोरखंडे,ॠतुजा डोंगरे यांनी उत्कृष्ट खेळांचे प्रदर्शन केले.विजयी संघास राष्ट्रीय व्हॉलीबॉल मार्गदर्शक श्री. कुलदिप कोंडे यांनी मार्गदर्शन केले,संघ व्यवस्थापक म्हणून गिताजली भावे व तृप्ती कदमबांडे यांनी काम पाहिले. संघाचे मेंटोर म्हणून शिवाजी जाधव यांनी काम पाहिले.विजयी संघातील खेळाडूंचे शाळेचे संचालक अन्वीत पाठक,अंचिता भोसले,प्राचार्या राधिका वैध,सचिन गायवळ ,रामदास लेकावळे यांनी अभिनंदन केले.

नेवासा (गौरव डेंगळे):येथील रोजलँड इंग्लिश मीडियम सीबीएसई स्कूलमध्ये दिनांक २८,२९ व  ३० डिसेंबर दरम्यान वार्षिक क्रीडा महोत्सवाचे आयोजन केले आहे.या महोत्सवाचे उद्‍घाटन क्रीडा प्रशिक्षक श्री सुरेश लव्हाटे, व्हॉलिबॉल प्रशिक्षक श्री पापा शेख यांच्या हस्ते करण्यात आले.

या कार्यक्रमाच्या प्रास्ताविकातून संस्थेचे संस्थापक अध्यक्ष श्री भाऊसाहेब अंबाडे पाटील यांनी शालेय क्रीडा क्षेत्राचा आढावा सादर केला.या वेळी सुरेश लव्हाटे 

 यांनी आपल्या शालेय जीवनातील आठवणींना उजाळा देत विद्यार्थ्यांना खेळाविषयी मार्गदर्शन करून खेळाचे महत्त्व पटवून दिले. तसेच, खेळातून होत असलेल्या व्यायामामुळे आरोग्य निरोगी राहण्यास मदत होत असल्याचे सांगितले. उद्घाटन कार्यक्रमावेळी राज्य,जिल्हा, विभाग पातळीवर क्रीडा क्षेत्रात उल्लेखनीय कार्य करणाऱ्या खेळाडूंनी क्रीडा ज्योत प्रांगणात मिरवली.या वेळी स्पर्धकांनी स्पर्धेपूर्वी खेळाविषयी शपथ घेतली.या तीन दिवसीय वार्षिक क्रीडा महोत्सवामध्ये व्हॉलीबॉल,क्रिकेट,कबड्डी,खो-खो,१०० मीटर धावणे,२०० मीटर धावणे,४०० मीटर धावणे,लांब उडी,रस्सीखेच अशा विविध स्पर्धेचा आयोजन करण्यात आले आहे.या वेळी संस्थेचे अध्यक्ष भाऊसाहेब अंबाडे पाटील, सदस्या निकिता दिपक अंबाडे, रूपाली अजित अंबाडे,शाळेचे प्राचार्य हेमंत सोलंकी, सुनिलकुमार जैन

तसेच शिक्षक-शिक्षक इतर कर्मचारी उपस्थित होते.