bindas news

सिल्लोड, प्रतिनिधी : तालुक्यात शुक्रवारी रात्री झालेल्या मुसळधार पावसाने शेतकऱ्यांच्या मेहनतीवर पाणी फेरले असून हजारो हेक्टरवरील मका, सोयाबीन, ज्वारी, बाजरी, कपाशी आदी पिकांचे अतोनात नुकसान झाले आहे. रात्री झालेल्या या अतिवृष्टीमुळे तालुक्यातील सर्व लहान- मोठ्या नद्या दुथडी भरुन वाहिल्या. यामुळे अनेक मार्गांवरील वाहतूक ठप्प झाली होती. रात्री झालेल्या या पावसाने मागील विक्रम मोडीत काढले. तालुक्यात रात्री सरासरी 78 मि. मी. पाऊस झाला. या पावसात तालुक्यातील काही गावांमध्ये जुन्या घरांची पडझड झाली असून दोन वर्षांपासून कोरडा असलेला निल्लोड प्रकल्प तुडुंब भरला आहे. सिल्लोड शहरातील काही भागांमधील घरांमध्ये पाणी शिरले होते. या पावसात धामणी- पिरोळा येथील मेंढपाळांच्या 25 मेंढया दगावल्या आहेत. रात्री झालेल्या या मुसळधार  पावसामुळे नागरिकांनी रात्र अक्षरशः  जागून काढावी लागली.

         तालुक्यात परतीच्या पावसाने कहर केला असून  शुक्रवारी रात्री झालेल्या मुसळधार पावसाने मका, सोयाबीन, ज्वारी, कपाशी आदी पिकांची अक्षरशः दाणादाण उडाली. तालुक्यात रात्री सर्वच मंडळांमध्ये अतिवृष्टी झाली. यात सर्वाधिक 100 मि. मी. पाऊस निल्लोड मंडळामध्ये झाला. त्याखालोखाल भराडी 95, बोरगाव बाजार 84, अजिंठा 72, अंभई 69, गोळेगाव 68, आमठाणा 68, तर सिल्लोड मंडळात 67 मि. मी. पाऊस झाला. या पावसामुळे पाण्याची आवक वाढल्याने काही माती बांधांना फुटण्याचा धोका निर्माण झाला होता. परंतु लोकप्रतिनिधी व नागरिकांनी वेळीच दखल घेत सांडव्याची रुंदी वाढवल्याने संभाव्य धोका टळला.

       गेल्या पंधरादिवसांपासून दररोज पाऊस पडत असल्याने पिकांचे अतोनात नुकसान झाले आहे. मका, ज्वारी, सोयाबीन आदी पिकांच्या ऐन सोंगनीच्या हंगामातच पावसाने लावून धरल्याने मकाच्या कणसांना कोंब फुटली आहे, तर कपाशीच्या परिपक्व कैऱ्या कुजत आहेत. गेल्या पंधरादिवसात तालुक्यात दोन वेळा झालेल्या अतिवृष्टीमुळे शेतकऱ्यांच्या मेहनतीवर पाणी फेरले असून हातातोंडाशी आलेला घास हिरावला आहे. हजारो हेक्टरवरील पिके पाण्याखाली असून या अस्मानी संकटामुळे शेतकरी हवालदिल झाला आहे.

अनेक रस्त्यांवरील वाहतुक ठप्प
रात्री झालेल्या या पावसामुळे अजिंठा- बुलढाणा मार्गावरील रायघोळ नदीच्या पुलावरुन पाणी वाहत असल्याने वाहतूक ठप्प होती. शिवाय अंभई- उंडणगाव, उपळी- भराडी, केळगाव- आमठाणा, म्हसला- भराडी या रस्त्यावरील पुलांवरुन पाणी वाहत असल्याने काही तास वाहतूक ठप्प होती. सिल्लोड- औरंगाबाद महामार्गावरील बनकिन्होळाजवळील पुलाचा अर्धा भाग वाहून गेला. यामुळे या मार्गावरील वाहतूक काही तासांसाठी निल्लोड, सताळ पिंप्रीकडून वळवण्यात आली होती.




   रात्री झालेल्या या मुसळधार पावसात धामणी- पिरोळा येथील अशोक गोरे, शिवाजी गोरे, सखाराम गोरे या मेंढपाळांच्या 25 मेंढया दगावल्या आहेत. एकीकडे शेतातील पिकांचे अतोनात नुकसान झाले, तर दुसरीकडे मेंढया दगावल्याने या मेंढपाळांचे मोठे आर्थिक नुकसान झाले. दगावलेल्या मेंढयाची नुकसान भरपाई द्यावी अशी मागणी या मेंढपाळांनी केली आहे. दरम्यान पशुधन अधिकारी, तलाठी यांनी घटनेचा पंचनामा केला.

धानोरा येथे नागरिकांचे स्थलांतर

 
धानोरा येथील माती बांध तुडुंब भरुन सांडव्यातून पाणी निघाल्याने नदीला पूर आला. यामुळे शेतवस्त्यांवरील घरांना पाणी लागले होते. शिवाय माती बांध फुटण्याचा संभाव्य धोका लक्षात घेत शेतवस्त्यांवरील नागरिकांना सुरक्षास्थळी हलवण्यात आले होते.

आता ओला दुष्काळ

      सलग दोन- तीन वर्षांपासून कोरड्या दुष्काळामुळे शेतकरी मेटाकुटीला आलेला होता. यंदा पावसाच्या मेहेरबानीमुळे पिके जोमात आली होती. परंतु ऐन सोंगनीच्या हंगामात परतीच्या पावसाने होत्याचे नव्हते केले. यामुळे दोन- तीन वर्षांपासून कोरड्या दुष्काळामुळे, तर यंदा ओल्या दुष्काळाने शेतकऱ्यांचे आर्थिक कंबरडे मोडले आहे.

सिल्लोड ( प्रतिनिधी ) दि.2, परतीचा पावसामुळे शेतकऱ्यांचे अतोनात नुकसान झाले आहेत, शेतकऱ्यांनी खचून न जाता धीर धरावा, नुकसानग्रस्त प्रत्येक शेतकऱ्यांना नुकसानभरपाई मिळेल अशी ग्वाही मंत्री एकनाथ शिंदे यांनी दिली.

परतीच्या पावसामुळे सिल्लोड तालुक्यात झालेल्या नुकसानीची पालकमंत्री ना.एकनाथ शिंदे यांनी पाहणी केली. यावेळी नुकसानग्रस्त शेतकऱ्यांशी बोलताना ना. शिंदे बोलत होते.

या दरम्यान शिवसेना सचिव अनिल देसाई, शिवसेना नेते माजी खा. चंद्रकांत खैरे, शिवसेना आमदार अब्दुल सत्तार, उदयसिंग राजपूत, शिवसेना जिल्हाप्रमुख नरेंद्र त्रिवेदी, जिल्हा परिषदेच्या अध्यक्षा ऍड देवयानी डोंनगावकर, उपाध्यक्ष केशवराव तायडे आदींची प्रामुख्याने उपस्थिती होती.

यावेळी आमदार अब्दुल सत्तार यांनी शेतकऱ्यांना अटी व शर्ती बाजूला ठेवून पीक विमा काढलेल्या व विमा न काढलेल्या प्रत्येक शेतकऱ्यांना नुकसान भरपाई देवून शेतकऱ्यांना सरसकट कर्ज माफी देण्याची तसेच रब्बी पिकासाठी बियाणे व खते मोफत देण्यात यावे, जनावरांना आता दावणीवर चारा उपलब्ध करण्याची मागणी केली.

यावर पालकमंत्री एकनाथ शिंदे म्हणाले की, शेतकऱ्यांचे पूर्ण नुकसान झालेले आहेत. विमा कंपनी यांना नुकसान भरपाई देण्यासाठी फार किचकट अटी न लावता नुकसान भरपाई देण्याच्या सूचना दिल्या आहेत. जितके नुकसान तितके भरपाई शेतकऱ्यांना मिळावी यासाठी शिवसेना कटिबद्ध आहे. शेतकऱ्यांना रब्बीसाठी मदत तसेच जनावरांना चारा देण्यासाठी जिल्हाधिकारी यांना सूचित करण्यात येणार असल्याची माहिती मंत्री शिंदे यांनी दिली.

औरंगाबाद : शहरातील सेव्हन हिल विद्यानगर परिसरात बनावट नोटा विक्री करणार्‍या दोघांना सापळा लावून पुंडलिक नगर पोलिसांनी अटक केली. तर या टोळीतील एकाला आझाद चौक, सिडको येथून पोलीस निरीक्षक व्यंकटेश केंद्रे यांच्या मदतीने अटक करण्यात आली.  शेख समरान रशिद (२४,रा. नेहरुनगर) सैय्यद सैफ सय्यद असफ(२४,रा. नेहरु नगर  ) आणि सय्यद सलीम सय्यद मोहम्मदयार (२२.रा. रांजणगाव शेणपुंजी) अशी अटक करण्यात आलेल्या आरोपींची नावे आहेत.पोलिसांनी दिलेल्या माहितीनुसार, मागील काही दिवसांपासून शहरात  बनावट नोटा तयार करण्याचे उद्योग सुरु आहेत. गुरुवारी दुपारी साडेतीन वाजेच्या दरम्यान एपीआय घनश्याम सोनवणे यांना विद्यानगर परिसरात बनावट नोटाचा व्यवहार होणार असल्याची गुप्त माहिती मिळाली, त्यांनी  या भागात सापळा लावला. रात्री ८.४५ वाजेच्या सुमारास सय्यद सैफ हा दुचाकीवर विद्यानगरात आला. त्याठिकाणी सय्यद सलीमला १०० रु. दराच्या बनावट नोटा देतांना सोनवणे यांनी दोघांना ताब्यात घेतले. सैफ ने जप्त केलेल्या नोटा आझाद चौकातील शे.समरान रशीदकडून घेतल्याचे सांगितले. यानंतर रशीद यालाही पोलिसांनी ताब्यात घेतले. बनावट नोटांचे संबंध मालेगाव, नाशिक, बदनापूरपर्यंत असल्याची माहिती पोलिसांनी दिली. पोलिसांनी आरोपींच्या ताब्यातून बोगस १२ हजार ४०० रुपये, प्रिंटर, कागद असा एकूण ८६ हजार ८०० रुपयाचा ऐवज जप्त केला. या प्रकरणातील एक आरोपी नाशिकमध्ये असल्याची माहिती मिळाली असून पोलिसांचे एक पथक त्याच्या अटकेसाठी नाशिककडे रवाना झाले आहे.