bindas news

श्रीरामपूरच्या विकासासाठी अनेक प्रकल्पांची केली मागणी

सलीमखान पठाण (प्रतिनिधी)श्रीरामपूर - सध्या सुरू असलेल्या विधिमंडळाचे अधिवेशनामध्ये काल रात्री श्रीरामपूरचे आमदार हेमंत ओगले यांनी अत्यंत अभ्यासपूर्ण भाषणाद्वारे राज्यपालांच्या अभिभाषणावर चर्चेत भाग घेतला आणि श्रीरामपूर सह राज्यातील अतिक्रमणाच्या प्रश्नावर सरकारने घेतलेल्या भूमिकेचा जाहीर धिक्कार केला.

काल दिवसभर राज्यपालांचे अभिभाषणावर चर्चा सुरू होती.मात्र सत्ताधारी पक्षाने विरोधी पक्षांना फारशी बोलायची संधी दिली नाही.काँग्रेसच्या आमदारांना तर पार शेवटी संधी मिळाली.रात्री साडेसात वाजता आमदार ओगले बोलण्यास उभे राहिले. आपल्या सुमारे बारा मिनिटाच्या घणाघाती भाषणात त्यांनी सरकारचे वाभाडे काढले.

श्रीरामपूर सह राज्यामध्ये सध्या अतिक्रमणाचा प्रश्न गाजत आहे.सरकारने अतिक्रमण काढताना 08 मार्च 2019 चा जो जी आर आहे.त्यानुसार सर्वांना घरे देण्याचे जाहीर केलेले आहे. 2011 पूर्वीच्या लोकांना ते जिथे राहतात तिथेच घरे देण्याचा शासनादेश आहे.मात्र या आदेशाची पायमल्ली करत अत्यंत निर्दयीपणाने श्रीरामपूरात अतिक्रमणे काढण्यात आली. बाराशे दुकाने आणि 130 घरे जमीन दोस्त करण्यात आली.अनेक प्रपंच रस्त्यावर आले. त्यांना दोन वेळच्या जेवणाची सुद्धा आता चिंता लागली आहे असे सांगून अतिक्रमण काढताना कोणतीही दयामया दाखवण्यात आली नाही.दोन महिन्यांची बाळंतीण आपल्या बाळाला घेऊन या अतिक्रमण काढणाऱ्या लोकांना आडवी आली तरी तिचे घर जमीन दोस्त करण्यात आले.सध्या हे कुटुंब रेल्वे स्टेशनवर राहत असल्याचे सांगून मानवता धर्म हा काही प्रकार आहे याची सरकारला जाणीव आहे का असा प्रश्न विचारून त्यांनी सरकारचा धिक्कार केला.

इतर मुद्द्याचा परामर्ष घेताना आमदार ओगले यांनी अरबी समुद्रात छत्रपती शिवाजी महाराजांचे स्मारक तसेच मुंबईतील हिंदू मिल येथे डॉक्टर बाबासाहेब आंबेडकर यांचे स्मारकाचे काम का रखडले आहे ? ते कधी पूर्ण होणार असा प्रश्न विचारला. 

एकात्मिक औद्योगिक केंद्र व माल वाहतूक केंद्र राज्यामध्ये निर्माण करण्याचे सरकारचे धोरण आहे. यामध्ये अनेक ठिकाणी औद्योगिक भूखंड पडीक आहेत.सदरचे केंद्र श्रीरामपूर येथे व्हावे.या ठिकाणी विमानतळ,चांगले रस्ते, रेल्वे सुविधा उपलब्ध आहे. त्यामुळे एकात्मिक औद्योगिक केंद्र श्रीरामपूरला देण्याची आग्रही मागणी त्यांनी केली.तांत्रिक वस्त्रोद्योग अभियान राबवताना शेतकऱ्यांच्या कापसाला आठ हजार रुपये क्विंटल भाव द्यावा तसेच शेतकऱ्यांच्या उसाला चार हजार रुपये टन भाव द्यावा अशी मागणी केली. 

मुख्यमंत्री युवा कार्य प्रशिक्षण योजनेतील निवड झालेल्या एक लाख युवकांना गेल्या सहा महिन्यापासून पगार मिळालेला नाही. तो त्यांना त्वरित मिळावा तसेच सदरचा प्रशिक्षण कालावधी एक वर्षाचा करण्यात यावा अशी ही मागणी त्यांनी केली.

अहमदनगर जिल्ह्यामध्ये शिर्डी - शिंगणापूर हे आंतरराष्ट्रीय तीर्थस्थान असून दोन्ही तीर्थस्थानांना जोडणारा  नगर मनमाड रस्ता हा गेली अनेक वर्ष खराब झालेला आहे.हजारो माणसे त्या ठिकाणी मेलेली आहेत.तरी हा रस्ता तातडीने दुरुस्त करण्याबाबत संबंधितांना योग्य आदेश द्यावेत असे ते म्हणाले. सोयाबीन खरेदीमध्ये होणारा भ्रष्टाचार शोधून काढण्याची मागणी देखील त्यांनी केली. अंगणवाडी सेविका निवड समितीचे अध्यक्ष पद आमदारांकडे होते. त्यात आता बदल करण्यात आला आहे. तसेच एस सी व ओबीसी चे गुण कमी केले आहे.त्यामुळे एससी आणि ओबीसी चे आरक्षण कमी करण्याचा शासनाचा प्रयत्न आहे का ? असा प्रश्न विचारून सदरचे प्रवर्ग आरक्षण नियमित करावे व तोपर्यंत ही भरती स्थगित करावी अशी मागणी त्यांनी केली. 

2011 पूर्वीच्या कॉलेजेसना शंभर टक्के अनुदान द्यावे असेही ते म्हणाले. 

मिशन लक्षवेध योजनेअंतर्गत ग्रामीण भागामध्ये क्रीडा संकुले उभारण्यात यावी, त्यामध्ये श्रीरामपूरचा अग्रक्रमाने विचार करावा अशी जोरदार मागणी त्यांनी केली. 

घर घर संविधान कार्यक्रमांतर्गत सरकार काही उपक्रम राबवीत आहे. परभणी येथे डॉक्टर बाबासाहेब आंबेडकर यांच्या पुतळ्याची मोडतोड करण्यात आली तसेच संविधानाचा अपमान करण्यात आला.या घटना करणाऱ्यांना कडक शिक्षा करावी अशी मागणी त्यांनी केली. 

श्रीगोंदा तालुक्यातील पेडगाव येथील राहणारा मी असून त्या ठिकाणी बहादूरगड किल्ला आहे. या किल्ल्याशी छत्रपती संभाजी महाराजांच्या आठवणी निगडित आहेत.तरी सदरच्या किल्ल्या चा राष्ट्रीय स्मारकात समावेश करावा अशी ही मागणी त्यांनी केली. निवडणुकीपूर्वी मुख्यमंत्री देवेंद्र फडणवीस यांनी शेतकऱ्यांच्या कर्जमाफीची घोषणा केली होती.मात्र त्याची अंमलबजावणी झालेली नाही. ती सुद्धा त्वरित करावी असेही ते म्हणाले.

चौकट

सरकारच्या एकूणच कामकाज करण्याच्या पद्धतीवर आसूड ओढतांना आमदार हेमंत ओगले यांनी आपल्या भाषणात -

*बडी सफाई से झूट बोलते है कुछ लोग,उन्हे खबर भी नही हमे सब कुछ बखुबी मालूम है* 

असा शेर सादर करून आपल्या भाषणाला सुरुवात केली.

*आमदारांचे अभिनंदन*

आमदारकीला निवडून आल्यानंतर हेमंत ओगले यांचे हे दुसरे अधिवेशन होते यापूर्वी नागपूर येथे अल्पकालीन अधिवेशन झाले होते.दोन्ही अधिवेशनात त्यांनी श्रीरामपूर मतदारसंघाच्या विकासाचे प्रश्न आवर्जून मांडले.यापूर्वी कधीही असं झालं नव्हतं.तालुक्याच्या प्रश्नांची अभ्यासपूर्ण मांडणी करून विधानमंडळात त्यावर आवाज उठविल्याबद्दल आमदार हेमंत ओगले यांचे श्रीरामपूर शहर व तालुक्यातील जनतेने अभिनंदन केले आहे .

चौकट

*पुन्हा ती गांधी टोपी*

काल विधानसभेत आपल्या भाषणाला सुरुवात करण्यापूर्वी आमदार ओगले यांनी श्रीरामपूर जिल्हा झाला पाहिजे असे वाक्य लिहिलेली गांधी टोपी पुन्हा एकदा प्रधान केली होती. विधानसभेत प्रत्येक वेळी बोलताना ते या टोपीचा वापर करतात त्यामुळे श्रीरामपूर जिल्ह्याच्या प्रश्नाला विधानसभेत चालना मिळते कालही आपले भाषण करताना त्यांनी ही टोपी परिधान केली होती. विधानसभेत तो एक चर्चेचा विषय होता.

बेलापूर

भगवान शिव हे संहारकर्ता आणि पुनरुत्थान करणारे देव असून, ते भक्तांच्या सर्व संकटांचे निवारण करतात. ते त्रिमूर्तींपैकी एक असून सृष्टीचा समतोल राखतात. महाशिवरात्रीच्या दिवशी भगवान शिव आणि माता पार्वती यांचा विवाह झाला, असे मानले जाते. तसेच, या दिवशी भगवान शिवाने तांडव नृत्य केले होते, असे अनेक धर्मग्रंथांमध्ये नमूद आहे. शिवभक्त या दिवशी उपवास करतात, जागरण करतात, मंत्रजप व अभिषेक करून भगवान शिवाची आराधना करतात.

    भगवान शंकराच्या तिसऱ्या नेत्रातून प्रगट झालेल्या अग्निनारायणाचाच अवतार म्हणजे अडबंगनाथ महाराज आहे. असा हा पवित्र अडबंगनाथ जन्मोत्सव व महाशिवरात्री उत्सवाची प्रथा गुरुवर्य नारायणगिरीजी महाराज यांनी घालून दिलेली आहे. त्यामुळे या दिवसाला गुरुवर्य नारायणगिरी महाराज यांच्या आशीर्वादाने विशेष महत्व आहे.

   अश्या या विशेष दिवशी अत्यंत उत्साहाने विविध धार्मिक  कार्यक्रम होणार आहेत. कार्यक्रमांची सुरुवात बुधवार, २६ फेब्रुवारी २०२५ रोजी सकाळी ७ वाजता नाथांचा अभिषेक व होम हवन होईल. त्यानंतर सकाळी १० वाजता ज्या भावीकांचे धर्मनाथ बीज उत्सवासाठी अनमोल योगदान लाभलेले आहे अशा भाविकांचा कृतज्ञता सन्मान सोहळा स्वामी अरुणनाथगिरी महाराज यांच्या शुभहस्ते होणार आहे. त्यानंतर सकाळी 11 वाजता स्वामी अरुणनाथगिरी महाराज यांचे सत्संग प्रवचन होईल. तसेच दु.12 वाजता ओम चैतन्य अडबंगनाथ जन्मोत्सव साजरा होईल.

  तद्नंतर खिचडी महाप्रसाद श्री.अर्जुन आप्पा लोखंडे पाथरे  यांच्या वतीने होईल व संतपूजन श्री.बाळासाहेब वाकचौरे नाशिक यांच्या वतीने होईल. 

या दिवशी हजारो भाविकांना अडबंगनाथांचे दर्शन घेण्याचा अभूत पूर्व योग प्राप्त होणार आहे.भक्तिरसात न्हालेल्या वातावरणात हा सोहळा भाविकांसाठी अपूर्व आनंद देणारा ठरणार आहे. महाशिवरात्रीच्या निमित्ताने श्री अडबंगनाथ मंदिरात आध्यात्मिक लहरींनी भारलेले वातावरण अनुभवता येणार आहे. भव्य दिव्य असा महाशिवरात्री व अडबंगनाथ जन्मोत्सव आयोजित केलेला आहे तरी या ठिकाणी दिवसभर हजारो भाविकांसाठी महाप्रसादाचे आयोजन करण्यात आलेले आहे. या ठिकाणी अन्नक्षेत्र, गुरुकुल चालू आहे तरी आपणास कार्यक्रमासाठी मदत करण्याची इच्छा असेल त्यांनी संस्थानशी संपर्क साधावा असे आवाहन श्री क्षेत्र अडबगनाथ देवस्थानचे महंत अरुणगीरीजी महाराज यांनी केले आहे 

तसेच हजारो शिवभक्तांनी या पवित्र सोहळ्यात सहभागी होऊन आध्यात्मिक लाभ घ्यावा, असे आवाहन देवस्थानच्या वतीने करण्यात आले आहे.

३८ व्या राष्ट्रीय क्रीडा स्पर्धेत तिरंदाजीमध्ये सर्वाधिक २२ विक्रम झाले. झारखंडच्या ऑलिंपियन दीपिका कुमारीने चार राष्ट्रीय खेळांमध्ये विक्रम प्रस्थापित केले.तिने ७० मीटर, २x७० मीटर, महिला संघ आणि मिश्र संघात हा विक्रम केला आहे. या राष्ट्रीय खेळांमध्ये तिरंदाजीमध्ये उत्तराखंडने फक्त एकच विक्रम केला आहे. उत्तराखंडच्या आदर्श पनवारने भारतीय फेरीत दोन राष्ट्रीय खेळांचे विक्रम मोडले.

राष्ट्रीय खेळांचे आयोजन करणारे उत्तराखंड हे १२ वे राज्य बनले!!!

स्थापनेच्या २५ व्या वर्षाच्या सुरुवातीला, उत्तराखंडने राष्ट्रीय खेळांचे आयोजन करून देशभरात क्रीडाभूमी म्हणून आपली वेगळी ओळख निर्माण केली आहे. उत्तराखंड हे राष्ट्रीय खेळांचे आयोजन करणारे देशातील १२ वे राज्य बनले आहे.

१९२४ मध्ये देशात भारतीय ऑलिंपिक खेळ सुरू झाले. मग शहरांना यजमानपद देण्यात आले. १९३८ पर्यंतच्या ८ आवृत्त्यांपैकी ३ स्पर्धा लाहोरमध्ये झाल्या.त्यानंतर, १९४० पासून त्याचे नाव बदलून राष्ट्रीय खेळ असे करण्यात आले. १९४० ते १९७९ पर्यंत, १७ आवृत्त्या शहरांनी आयोजित केल्या होत्या.

कटक, मद्रास आणि लाहोर येथे खेळ दोनदा आयोजित करण्यात आले होते.परंतु १९८५ मध्ये,२६ व्या राष्ट्रीय खेळांपासून,त्याचे स्वरूप बदलण्यात आले आणि ते ऑलिंपिक स्वरूपाच्या धर्तीवर आयोजित करण्याचा निर्णय घेण्यात आला. ज्यामध्ये राज्यांना खेळांचे आयोजन देण्यात येऊ लागले.१९८५ मध्ये दिल्ली पहिले यजमान बनले.

तेव्हापासून,२०२५ पर्यंत १३ आवृत्त्या आयोजित करण्यात आल्या आहेत आणि उत्तराखंडला ३८ व्या राष्ट्रीय खेळांचे यजमानपद मिळाले. उत्तराखंड हे यजमानपद भूषवणारे १२ वे राज्य बनले आहे. तर केरळमध्ये दोनदा खेळ आयोजित करण्यात आले आहे. उत्तर प्रदेशसारखे मोठे राज्य आजपर्यंत राष्ट्रीय खेळांचे आयोजन करू शकलेले नाही.

जम्मू येथे रेल्वे यार्ड चे मोठे काम सुरू  असल्याने सुमारे ३७ दिवसांसाठी वेगवेगळ्या गाड्या रद्द करण्यात आलेल्या आहेत.यामध्ये पुण्याहून जम्मूतावीला जाणारी 11077 क्रमांकाची गाडी १७ फेब्रुवारी ते ४ मार्च पर्यंत रद्द करण्यात आली आहे तर जम्मूतावीहून पुण्याला येणारी 11078 क्रमांकाची गाडी २१ फेब्रुवारी ते ८ मार्च पर्यंत बेलापूर म्हणजे श्रीरामपूर रेल्वे स्टेशनवर येणार नाही.त्यामुळे सर्व प्रवाशांनी याची नोंद घ्यावी असे आवाहन प्रवासी संघटनेने केले आहे.

दरम्यान मध्ये रेल्वेने झेलम रेल्वे १६ दिवस रद्द करण्याचा निर्णय घेतल्याबद्दल नगर व श्रीरामपूर मधील प्रवाशांनी तीव्र नाराजी व्यक्त केली आहे.

या भागातून मोठ्या संख्येने प्रवासी वैष्णोदेवीसाठी या गाडीने जम्मूतावी ला जातात तसेच दिल्ली आणि पंजाब मधील अनेक गावांना जाण्यासाठी ही थेट गाडी असल्याने प्रवाशांची मोठी गैरसोय होणार आहे. रेल्वे खात्याने ही गाडी पूर्णपणे रद्द न करता किमान नवी दिल्लीपर्यंत सुरू ठेवायला पाहिजे होती अशी अपेक्षा बंटी गुरुवाडा,सलीमखान पठाण,अशोक उपाध्ये,राजेंद्र सोनवणे, अयाज तांबोळी यांनी व्यक्त केली.रेल्वेच्या या तुघलकी निर्णयाने प्रवाशांना अनेक गैरसोयीना सामोरे जावे लागणार आहे.सध्या लग्नसराई व परीक्षेचा कालावधी सुरू असल्याने या काळात होणाऱ्या गैरसोयीबद्दल प्रवाशांनी तीव्र नाराजी व्यक्त केली आहे.