मोताळा जवळ संचार बंदीत ही खेळ चाले,8 जुगारी पोलिसांच्या जाळ्यात,बुलडाणा डीवायएसपी पथकाची धाडसी कारवाई.

बुलडाणा - 7 एप्रिल

मोताळा तालुक्यातील परडा गावा जवळ सुरु असलेल्या जुगार अड्डयावर बुलडाणा उपविभागीय पोलीस अधिकारी यांच्या पथकाने आज मंगळवारी छापा मारून 8 जुगाऱ्यांना रंगेहात पकडले. त्यांच्या कब्जातून रोख रकमेसह 6 दुचाकी, 6 मोबाईल असा एकूण 2 लाख 26 हजार 650 रुपयांचा मुद्देमाल जप्त करण्यात आला. या धडक कारवाईमुळे जुगाऱ्यांचे धाबे दणाणले आहे.एकी कडे संपूर्ण देश कोरोनाच्या धासकीत असतांना या जुगाऱ्यांचे खेळ चालत होते.

        मोताळा तालुक्यात बोराखेडी ठाणे अंतर्गत येत असलेले परडा शिवारातील हॉटेल ग्रीनपार्कच्या मागील शेतात टिनशेडमध्ये पैशांच्या हारजीतवर एक्का बादशाह नावाचा जुगार खेळणाऱ्या कैलास दत्तात्रय सरोदे (रा. बोराखेडी), गजानन गोविंदा पाटील (रा. तिघ्रा), विवेक उर्फ पिंटू पांडुरंग सुरडकर (रा. मोताळा), राजेश पांडुरंग कांडेलकर (रा. मोताळा), अनिल भाऊलाल जैन (रा. मोताळा), शिवाजी बाबाराव जोहरी (रा. कोथळी), निंबाजी राजाराम चहाकर (रा. बोराखेडी), भगवान सदाशिव जवरे (रा. परडा) या 8 जुगाऱ्यांना पोलिसांनी छापा मारून आज दुपारी रंगेहात पकडले. त्यांच्या ताब्यातून नगदी 21 हजार शंभर रुपये, सहा मोबाईल किंमत 30 हजार 500 रुपये, सहा दुचाकी किंमत 1 लाख 75 हजार रुपये व जुगाराचे साहित्य असा एकूण 2 लाख 26 हजार 650 रुपयांचा मुद्देमाल जप्त करण्यात आला. या प्रकरणी पोहेकाँ सुधाकर तारकसे यांच्या फिर्यादीवरून बोराखेडी पोलिसांनी उपरोक्त 8 जुगाऱ्याविरुद्ध कलम 12 (अ) मु.जु.का. प्रमाणे गुन्हा दाखल केला आहे. सदर कार्यवाही उपविभागीय पोलिस अधिकारी रमेश बरकते यांच्या मार्गदर्शनाखाली पोहेकाँ सुधाकर तारकसे, नापोकाँ विलास पवार, नापोकाँ मोहन डुकरे, पोकाँ सतीश राठोड यांनी केली. पुढील तपास बोराखेडीचे पोलिस निरीक्षक माधवराव गरुड यांच्या मार्गदर्शनात पोहेकाँ राजेश वानखेडे, पोकाँ शिवाजी मोरे करीत आहेत.