bindas news

अहमदनगर (प्रतिनिधी)-महिलांवरील अत्याचाराच्या गुन्ह्यांसंबंधी देशभर संतापाची लाट आहे. त्यातून हैदराबाद येथे पोलिसांनी केलेल्या एन्काउंटरचे समर्थनही केले जात आहे. नगरच्या पारनेर तालुक्यात मात्र अल्पवयीन मुलीवर बलात्कार केलेल्या आरोपीला मदत करण्यासाठी पन्नास हजारांची लाच घेताना पोलीस कर्मचारी पकडला गेला. लाचलुचपत प्रतिबंधक विभागाने ही कारवाई केली.रामचंद्र पांडुरंग वैद्य (मूळ रा. बोधेगाव, ता. शेवगाव) या पोलीस कर्मचार्‍यास पन्नास हजार रुपयांची लाच घेताना अटक करण्यात आली.पारनेर तालुक्यात एका अल्पवयीन मुलीवर बलात्कार झाला होता. त्याचा गुन्हा पारनेर पोलीस ठाण्यात दाखल आहे. त्यातील आरोपीला पोलिसांनी अटक केली आहे. मात्र, त्याला जामीन मिळवून देण्यासाठी आणि तपासात त्याला मदत करण्यासाठी आरोपीच्या नातेवाईकाकडे पोलिस कर्मचारी वैद्य यांनी पन्नास हजार रुपयांची लाच मागितली.आरोपीच्या मामाने यासंबंधी लाचलुचपत प्रतिबंधक विभागाकडे तक्रार केली. नगरच्या पोलिसांनी सापळा रचला. पारनेरमधील एका हॉटेलमध्ये पन्नास हजार रुपयांची लाच घेताना पोलिसाला पकडण्यात आले. ही कारवाई लाचलुचपत प्रतिबंधक विभागाचे पोलीस अधीक्षक सुनील कडासने, अपर पोलीस अधीक्षक नीलेश सोनवणे यांच्या मार्गदर्शनाखाली नगरचे पोलीस उपाअधीक्षक हरीष खेडकर, पोलीस निरीक्षक दीपक करांडे, पोलीस हवालदार तनवीर शेख, सतीष जोशी, रमेश चौधरी, प्रशांत जाधव, रवींद्र निमसे, वैभव पांढरे, हारूण शेख, अशोक रक्ताटे यांच्या पथकाने केली.पकडण्यात आलेला पोलिस वैद्य पोलिस निरीक्षकाचा रायटर आणि तपासात मदत करणारा कर्मचारी आहे. त्याआधारे ही लाच स्वीकारून बलात्काराच्या गुन्ह्यातील आरोपीला जामीन मिळवून देण्याचे आणि पुढेही तपासात मदत करून सुटकेचा मार्ग मोकळा करण्याचे आश्वासन त्याने आरोपीच्या मामाला दिले होते. 

अहमदनगर- जीवनसाथी वेबसाईटवर महिलांच्या नावाने बनावट प्रोफाइल तयार करून फसवणूक करणाऱ्या उच्चशिक्षित एकास सायबर क्राईम विभागाने जेरबंद केले आहे. 

याबाबत पोलिसांनी दिलेली माहिती अशी की, दि. १६ नोव्हेंबर २०१८ ते दि.१३ डिसेंबर २०१९ या कालावधीत रेखा निलेश कदम (रा.अकती बिल्डिंग, एचएमसी मार्केट जवळ सेक्टर १९ वाशी, नवीमुंबई) असे नाव सांगणारे अज्ञात व्यक्तीने आँनलाईन जीवन साथी या वेबसाईट वरुन संपर्क करून व्हाँटसअप मेसेजद्वारे लग्नाचे आमिष दाखवून १ लाख ६५ हजार रुपयांची फसवणूक झाली, अशी फिर्याद हनुमान मोहनराव काळे (रा.सारोळा ता.जामखेड) यांनी अहमदनगर सायबर क्राईम विभागात दाखल केला होता. या दाखल गुन्ह्याचा सखोल व तांत्रिक तपास करून सदर गुन्ह्यातील आरोपी हा बोरवली पश्चिम, मुंबई येथे असल्याची माहिती मिळाली. त्यानुसार रायडोगरी, कार्टर रोड बोरवली पश्चिम मुंबई या ठिकाणी विविध भागात, झोपडपट्टीत आरोपीचा शोध घेतला. त़ो दि.१८ डिसेंबरला पहाटेच्या सुमारास रायडोगरी, मुंबई परिसरात छापा टाकून आरोपीस ताब्यात घेतले. आरोपीला पोलीस खाक्या दाखवताच, गुन्हा केल्याची कबुली दिली. सदर बनावट अकाऊंट वरुन अन्य लोकांची आर्थिक फसवणूक केल्याचे आरोपींने सांगितले.प्रभारी जिल्हा पोलीस अधीक्षक सागर पाटील, नगर उपविभागीय पोलीस अधिकारी संदीप मिटके यांच्या मार्गदर्शनाखाली सायबर पोलीस ठाण्याचे पो.नि.अरुण परदेशी यांच्या नेतृत्वाखाली पोसई प्रतिक कोळी, पोहेकाँ योगेश गोसावी, उमेश खेडकर, पोना दिगंबर कारखिले, मलीकार्जुन बनकर, म पोना स्मिता भागवत, पोकाँ अरुण सांगळे, पोहेकाँ वासुदेव शेलार, पूजा भांगरे, राहुल हुसळे, विशाल अमते, भगवान कोंडार, अमोल गायकवाड, राहुल गुंडू, अभिजित अरकल आदींच्या पथकाने ही कारवाई केली. 

श्रीरामपूर (प्रतिनिधी)- शहरातील मौलाना आझाद चौकातील पाणीपुरवठा करणार्‍या पाण्याच्या टाकीची सुरक्षा व्यवस्था वार्‍यावर सोडण्यात आली आहे. त्यातच गेल्या अनेक दिवसांपासून टाकीची स्वच्छता नसल्याने स्वच्छतेबाबतही बारा वाजले आहेत. त्यामुळे नागरिकांना दूषित पाणीपुरवठा होत आहे. त्यामुळे नागरिकांचे आरोग्य धोक्यात आले आहे. परंतु पालिका प्रशासनाचे टाकीच्या दुरवस्थेकडे दुर्लक्ष आहे.अनेक दिवसांपासून शहरातील नागरिकांना अस्वच्छ पाणीपुरवठा होत आहे. त्यातच नगरपालिकेमार्फत आपल्या घरी येणारे पाणी ज्या टाक्यांतून येते त्यांच्या सुरक्षेचा प्रश्‍न निर्माण झाला आहे. येथील मौलाना आझाद चौकातील पाण्याच्या टाकीवर जाणार्‍या पायर्‍या तुटल्याने त्या टाकीला धोका निर्माण झाला आहे. वर जाता येत नसल्याने
टाकीची स्वच्छताही करता येत नाही. त्यामुळे अनेक दिवसांपासून टाकीची स्वच्छता करण्यात आलेली नाही. या टाकीद्वारे शहरात पिण्याच्या पाण्याचा पुरवठा केला जातो.परंतू टाकीची अत्यंत दुरवस्था झाली आहे. टाकीची साफसफाई झालेली नसल्याने शहरातील नागरिकांना अस्वच्छ पाणी प्यावे लागत आहे. सदर टाकी स्वच्छ झाली नसल्याने टाकीत शेवाळ व अन्य घाण मोठ्या प्रमाणावर साचली आहे. यामुळे यातील पाण्यामुळे आरोग्याचे प्रश्‍न निर्माण होऊ शकतात. या गंभीर विषयाकडे नगरपालिका प्रशासनाचे साफ दुर्लक्ष होत आहे. जबाबदार अधिकारी व नगरसेवकांचे या गंभीर बाबीबाबत अनेक वेळा लक्ष वेधण्याचा प्रयत्न केला असता, त्यांनी याची योग्य दखल घेतली नाही. तरी लवकरात लवकर पाण्याच्या टाकीची स्वच्छता व्हावी अशी, मागणी परिसरातील नागरिकांमधून होत आहे.अन्यथा गेटबंद आंदोलन मौलाना आझाद चौकातील पाण्याची टाकीची साफसफाई करून नागरिकांना शुद्ध पाणीपुरवठा न झाल्यास एक जानेवारी 2020 रोजी नगरपालिका गेटबंद आंदोलन करण्यात येईल.-अहमदभाई जहागीरदार, जिल्हाध्यक्ष, शेतकरी संघटना.

अहमदनगर - पाथर्डी तालुक्यातील दैत्य नांदूर येथील हत्याकांडातील तीन आरोपींना स्थानिक गुन्हे शाखेने २४ तासाच्या आत अटक करून पाथर्डी पोलीस ठाण्यात हजर करण्याची जलदगतीने कारवाई केली.ज्ञानेश्वर विष्णू दहिफळे ( वय २८), राहुल शहादेव दहिफळे (वय २२) व भागवत हरिभाऊ नागरगोजे (वय ५०) अशी पकडण्यात आलेल्यांची नावे आहेत.याबाबत पोलिसांकडून मिळालेली माहिती अशी की, दैत्य नांदूर (ता.पाथर्डी) येथे ग्रामपंचायत निवडणुकीत झालेल्या पराभवाच्या कारणातून शहादेव पंढरीनाथ दहिफळे याने संजय बाबासाहेब दहिफळे व गणेश रमेश दहिफळे यांच्यावर बंदुकीने गोळीबार करून आरोपी विष्णू पंढरीनाथ दहिफळे, ज्ञानेश्वर विष्णू दहिफळे, द्वारका भागवत नागरगोजे, विष्णू दहिफळे यांची पत्नी, शहादेव दहिफळे यांची पत्नी व दोन मुले, ज्ञानेश्वर दहिफळे यांची पत्नी, पंढरीनाथ दहिफळे, अनिकेत भागवत दहिफळे (सर्व रा.दैत्य नांदूर ता.पाथर्डी) यांनी संजय बाबासाहेब दहिफळे, गणेश रमेश दहिफळे यांना लाकडी दांडके व कु-हाडीने मारहाण करून संजय बाबासाहेब दहिफळे याची हत्या केली. गणेश रमेश दहिफळे यास जिवे मारण्याचा प्रयत्न करून साक्षीदार ज्ञानेश्वर अशोक दहिफळे यास जखमी केले. या घटनेबाबत गणेश रमेश दहिफळे यांनी दिलेल्या फिर्यादी वरुन पाथर्डी पोलीस ठाण्यात कलम ३०२, ३०७, ३२४, १४३, १४७, १४८, १४९, ३२३, ५०४, ५०६ सह भारतीय हत्यार कायदा कलम ३, २५, ७ सह महाराष्ट्र पोलीस कायदा कलम ३७(१)(३)१३५ प्रमाणे सर्व आरोपी वर गुन्हा दाखल करण्यात आला आहे. सदर आरोपीचा स्थानिक गुन्हे शाखेच्या पथकाने पाथर्डी व अहमदनगर येथे शोध घेऊन ज्ञानेश्वर विष्णू दहिफळे, राहुल शहादेव दहिफळे व भागवत हरिभाऊ नागरगोजे याना पकडून पाथर्डी पोलीस ठाण्याच्या ताब्यात दिले.प्रभारी जिल्हा पोलिस अधीक्षक सागर पाटील, शेवगाव उपविभागीय पोलीस अधिकारी मंदार जवळे यांच्या मार्गदर्शनाखाली स्थानिक गुन्हे शाखेचे पो.नि. दिलीप पवार यांनी वेगवेगळ्या पथकाना दिलेल्या सुचनेनुसार पोसई गणेश इंगळे, पोहेकाँ विजय वेठेकर, रविंद्र कर्डिले, मन्सूर सय्यद, आण्णा पवार, संदीप घोडके, सागर गंवादे, रणजित जाधव, रोहिदास नवगीरे, रोहित मिसाळ, कमलेश पाथरूड, राहुल सोळुंके, दत्तात्रय गव्हाणे, शिवाजी ढाकणे, सचिन आडबल, सागर ससाणे, सागर सुलाने, रवि सोनटक्के, विनोद मासाळकर, विजय धनेधर, देवेंद्र शेलार, जालिंदर माने, संभाजी कोतकर, बाळासाहेब भोपळे आदींच्या पथकांनी ही कारवाई केली.

अहमदनगर, कोळपेवाडी (वार्ताहर) कोपरगाव तालुक्यातील कोळपेवाडी सुरेगाव येथील विद्यालयातील इयत्ता चौथीच्या विद्यार्थिनीला शाळा सुटल्यानंतर दुचाकीवर बसवून एका फार्म हाऊसवर नेले. तेथे तिच्यावर अत्याचार करणारा आरोपी अमोल अशोक निमसे याला सिन्नर तालुक्यात गजाआड करण्यात पोलिसांना यश आले आहे.शुक्रवारी सायंकाळी 4.40 वाजता शाळा सुटल्यानंतर विद्यार्थी आपापल्या घरी गेले. बहुतांशी विद्यार्थ्यांना त्यांचे पालक घेण्यासाठी येत असतात. अत्याचाराला बळी पडलेल्या मुलीला वडील नियमितपणे शाळेतून घेण्यासाठी येत असत. मात्र शुक्रवारी ते परगावी गेल्यामुळे त्यांनी त्यांच्या जवळच्या नातेवाईकांना या विद्यार्थिनीस शाळेतून आणण्यास सांगितले. मात्र नातेवाईकांना शाळेत येण्यास थोडा उशीर झाला. सायंकाळी 5.15 मिनिटांनी ते शाळेत आले.त्यावेळी त्यांना सदर मुलगी विद्यालयात नसल्याचे निदर्शनास आले. त्यांनी मुलीच्या वर्गशिक्षकांशी संपर्क केला असता शाळा सुटून अर्धा तास झाला असून तुमची मुलगी शाळा सुटल्यानंतर ज्या ठिकाणी थांबते त्या ठिकाणी असेल असे सांगितले. परंतु मुलगी त्या ठिकाणी नव्हती. नातेवाईकाने मुलीच्या घरी चौकशी केली. मात्र ती घरी आली नसल्याची माहिती मिळाली. त्यानंतर मुख्याध्यापक व सर्व शिक्षक शाळेत आले. त्यांनी शोध घेतला. मात्र ती आढळून न आल्याने मुलीचे अपहरण झाले असल्याची शंका आल्यामुळे पोलिसांना याबाबत माहिती देण्यात आली.या मुलीबाबत माहिती घेतली असता ही मुलगी निळा शर्ट घातलेल्या व्यक्तीच्या गाडीवर बसून गेल्याची माहिती समजली. सहाय्यक पोलीस निरीक्षक इंगळे यांनी शाळेचे विद्यार्थी व सदरची विद्यार्थिनी ज्या रस्त्याने घरी जाते त्या रस्त्यावरील सीसीटीव्ही फुटेज तपासले. यामध्ये कोळपेवाडी-सुरेगाव रस्त्यावरील हॉटेल आनंदचे सीसीटीव्ही फुटेजमध्ये ही मुलगी निळा शर्ट घातलेल्या आरोपीने त्याच्या मोटारसायकलवर पुढे बसवून घेवून जात असल्याचे दिसून आले.त्यानंतर डॉ. बाळासाहेब जुंधारे व जगदाळे कलेक्शनचे सीसीटीव्ही फुटेज तपासले असता आरोपीची गाडी मोतीनगर सुरेगावच्या दिशेने जातांना दिसून आली. त्यानंतर प्रमोद दंडवते यांच्या दुकानातील सीसीटीव्ही फुटेज तपासण्यात आले. त्यावेळी शिर्डी-लासलगाव रोडने शहाजापूरकडे जातांना दिसले. पोलिसांनी व शिक्षकांनी रात्रभर तपास करून देखील मुलगी मिळून आली नाही.दुसर्‍या दिवशी शनिवारी सकाळी मोतीनगर सुरेगाव येथे सदर मुलीच्या नातेवाईकाच्या घरी या मुलीला सोडून देण्यात आले. पोलिसांनी या मुलीला ताब्यात घेवून वैद्यकीय तपासणीसाठी कोपरगाव ग्रामीण रुग्णालयात गाठले. त्यावेळी तिच्यावर अत्याचार झाल्याचे निष्पन्न झाले. तिला पुढील उपचारासाठी जिल्हा रुग्णालयात हलविले आहे. शनिवारी शाळेचे मुख्याध्यापक राजेंद्र पाचोरे मुलीच्या शोध घेण्यासाठी शहाजापूर शिवारात गेले असता त्यांना शिवाजी बोरसे यांच्या फार्म हाऊसवर हिरो होंडा कंपनीची गाडी (एम. एच. 41-3033) चावीसह मिळून आली.गाडीच्या नंबरवरून गाडी मालकाची ओळख पटल्यानंतर त्यांनी आपली गाडी अमोल अशोक निमसे याला दिली असल्याचे सांगितले. एका महिलेने फार्म हाऊसवर शाळेचे दफ्तर आणि जेवणाचा डबा असून सकाळी 6 वाजेच्या दरम्यान आरोपी व मुलीला जातांना पाहिले असल्याचे सांगितले. पोलिसांनी घटनास्थळाची पाहणी केली. घटनास्थळी पोलिसांना अत्याचार झाले असल्याचे पुरावे आढळून आले.मुलीच्या वडीलांच्या फिर्यादीवरून कोपरगाव तालुका पोलिस ठाण्यात आरोपीविरूध्द गुन्हा दाखल करण्यात आला आहे.दरम्यान, स्थानिक गुन्हे शाखेचे पथक व कोपरगाव पोलीस पथकाने नाशिक जिल्ह्यातील सिन्नर तालुक्यातील वडंगळी येथून अखेर काल मंगळवारी रात्री पावणे दहा वाजेच्या सुमारास आरोपी अमोल निमसेचा शोध घेत अखेर त्याला सिन्नर तालुक्यातील वडगंळीतील एका तांड्यावर पोलीस पथकाने त्याला अटक केली आहे, अशी माहिती स्थानिक गुन्हे अन्वेषण विभागाचे पोलीस निरीक्षक दिलीप पवार यांनी दिली आहे.

चंद्रपूर : स्थानिक गुन्हे शाखेच्या पथकानी फिल्मी स्टाईल वाहनाचा पाठलाग करुन १४ लाख २३ हजार ६०० रुपयांचा मुद्देमाल जप्त केला. सदर कारवाई प्रिदर्शिनी चौकात करण्यात आली. या कारवाईत एकाला अटक करण्यात आली. शेख वसिम शेख शहाबुद्दीन (२८) रा. आनंदनगर वर्धा असे अटकेतील आरोपीचे नाव आहे.स्थानिक गुन्हे शाखेचे पथक पोलीस स्टेशन रामनगर परिसरात पेट्रोलिंग करीत असताना पडोली ते चंद्रपूरकडे येणाऱ्या चारचाकी वाहनातून दारूची वाहतूक करीत असल्याची माहिती मिळाली. या माहितीच्या आधारावर स्थानिक गुन्हे शाखेच्या पथकांनी वरोरा नाका चौकात नाकाबंदी करुन वाहनास थांबविण्याचा प्रयत्न केला. पोलिसांनी बघून वाहनचालकाने वाहन भरधाव वेगाने पळविले. पोलिसांनी वाहनाचा पाठलाग करून वाहनास प्रियदर्शिनी चौकात ताब्यात घेतले. या कारवाईत १४ लाख २३ हजार ६०० रुपयांचा मुद्देमाल जप्त केला. सदर कारवाई पोलीस अधीक्षक डॉ. महेश्वर रेड्डी यांच्या मार्गदर्शनाखाली स्थानिक गुन्हे शाखेचे पोलीस निरीक्षक ओमप्रकाश कोकाटे यांचे नेतृत्वात बोबाडे, संगीडवार, अमजद, संदीप मुळे, प्रशांत नागोसे, विनोद जाधव आदींनी केली.